Inatsit tunngaviusoq
Ataani atuarneqarsinnaapput utoqqalinermi aammalu siusinaartumik soraarnerussutisiat pillugit inatsisit tunngaviusut. Annertunerusumik paasisaqarnerusinnaavutit Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoqarfiup nittartagaani http://naalakkersuisut.gl – imi, inunnik isumaginninnermut tunngasuni inatsisit atuuttut alakkarnerisigut. Tassani Inatsisartut peqqussutaat nalunaarutillu atulersinneqartut il.il. atuarneqarlutillu aaneqarsinnaapput.
Utoqqalinermi soraarnerussutisiat
1. januaari 2010 aallarnerfigalugu inuit 65-inik ukioqalereersimasut utoqqalinermi soraarnerussutisiaqarsinnaatitaapput.
1. januaari 2015 aallarnerfigalugu utoqqalinermi soraarnerussutisiat kisimiittumut ukiumut 133.100 kr.-it angullugit annertussuseqarput. Soraarnerussutisiat annerpaat utoqqalinermi soraarnerussutisialinnut allamik soraarnerussutisiaqartumik aappaqartunut allaanerusarput. Ilanngussami takuneqarsinnaapput soraarnerussutisiat amerlassusaat annerpaat minnerpaallu, soraarnerussutisianut assigiinngitsunut immikkoortiternerini. Nammineq isertitat allat aammalu aapparisap isertitai allat aallaavigalugit soraarnerussutisiat naleqqussarneqartarput. Aapparisap inooqatigisalluunniit isertitaasa akileraarutaasussat annertussusaat apeqqutaatinnagu utoqqalinermi soraarnerussutisialik nammineq allanik isertitaqanngippat pisussaatitaavoq kisimiittumut aningaasat tunngaviusut amerlanersaasa 50 procentiatut annertutigisumik soraarnerussutisiaqatitaassalluni.
Utoqqalinermi soraarnerussutisiat meeqqanut tapeqarsinnaapput, soraarnerussutisialik meeqqanik 18 inorlugit ukiulinnik pilersuisussaatitaappat. Taamatullu utoqqalinermi soraarnerussutisiat aningaasat tunngaviusut saniatigut aalajangersimasumik atungassanik aammalu inummut tapinik ilaneqarsinnaapput.
Utoqqalinermi soraarnerussutisialik utoqqaat illuinut, napparsimmavinni isumaginninnermi immikkoortortaqarfimmut allamulluunniit isumaginninnikkut ulloq unnuarlu angerlarsimaffimmi ineqalersimappat aningaasat tunngaviusut annerpaartaasa 20 procentia soraarnerussutisiarineqassaaq, aningaasanik tunngaviusunik ilanngakkanik imaluunniit kaasarfimmiunik taaneqartunik, apeqqutaatinnagu soraarnerussutisialik allanik isertitaqartuunera.
Utoqqalinermi soraarnerussutisiat aningaasat tunngaviusut 1. juuli aallarnerfigalugu ukioq pineqartup siuliani akit inissisimaffiinik naleqqersuutip ineriartornera malillugu naleqqussarneqarput.
2016 sioqqullugu Inatsisartut inatsisaat nr. 3 7. maaji 2007-imeersoq utoqqalinermut soraarnerussutisialinnut, 1. juuli 2007 atuutilersumit utoqqalinermi soraarnerussutisiaqartitsisoqarpoq.
2016-imiit soraarnerussutisisarneq Inatsisartut inatsisaat nr. 20 23. november 2015-imeersoq malillugu ingerlalerpoq. Inuit tamarmik 64-it sinnerlugit ukiullit, aapparisap isertitai apeqqutaatinnagit tunngaviusumik soraarnerussutisisalerput ukiumut 59.900 kr.-inik annertussusilimmik. Tunngaviusumik isertitat saniatigut isertitat annertussusaat apeqqutaatillugit tunniunneqartarput, saniatigut isertitat 221.111 kr.-imiit amerlaneruppata tunngaviusumik soraarnerussutisiat ikilissapput 340.911 kr.-it sinnerlugit saniatigut isertitallit tunngaviusumik soraarnerussutisiassaqanngillat.
Siusinaartumik soraarnerussutisiat
Siusinaartumik soraarnerussutisiat inunnut timikkut, tarnikkut imaluunniit isumaginninnikkut inissisimanermik peqquteqarluni sulinissamut piginnaasat ataavartumik annikillisimappata tunniunneqartarput. Inuit 18-ileereersimasut sulilu 65-iliisimanngitsut siusinaartumik soraarnerussutisiaqarsinnaatitaapput, taamatullu 18 inorlugit ukiullit siusinaartumik soraarnerussutisiaqarsinnaapput qinnuteqartoq aappaminut, inooqatiminut meeqqamulluunniit pilersuisussaatitaappat.
Siusinaartumik soraarnerussutisiat kisimiittumut ukiumut 109.000 kr.-t angullugit annertussuseqarput. Soraarnerussutisiat annerpaat siusinaartumik soraarnerussutisialinnut allamik soraarnerussutisiaqartumik aappaqartumut allaanerusarput. Ilanngussami takuneqarsinnaapput soraarnerussutisiat amerlassusaat annerpaat minnerpaallu, soraarnerussutisiallit assigiinngitsunut immikkoortitersimanerini. Nammineq isertitat allat aammalu aapparisap isertitai allat aallaavigalugit soraarnerussutisiat naleqqussarneqartarput.
Siusinaartumik soraarnerussutisiat meeqqanut tapeqarsinnaapput, soraarnerussutisialik meeqqanut 18 inorlugit ukiulinnut pilersuisussaatitaappat, kommunilu najugarisaq aamma inummut tapeqartitsisinnaalluni.
Siusinaartumik soraarnerussutisialik utoqqaat illuinut, napparsimmavinni isumaginninnermi immikkoortortaqarfimmut allamulluunniit isumaginninnikkut ulloq unnuarlu angerlarsimaffimmi ineqalersimappat, aningaasat tunngaviusut annerpaartaasa 20 procentia soraarnerussutisiarineqassaaq aningaasanik tunngaviusunik ilanngakkanik imaluunniit kaasarfimmiunik taaneqartunik, apeqqutaatinnagu siusinaartumik soraarnerussutisialik allanik isertitaqartuunera.
2016 sioqqullugu siusinaartumik soraarnerussutisiat Inatsisartut inatsisaat nr. 4 7. maaji 2007-imeersoq siusinaartumik soraarnerussutisialinnut 31. maaji 2010 atuutilersumit siusinaartumik soraarnerussutisiaqartitsisoqarpoq.
2016-imi juulip aallaqqaataata kingorna Inatsisartut inatsisaat nr. 40 9. decembari 2015-imeersoq malillugu siusinaarluni soraarnerussutisiallit soraarnerussutisiaqalertussallu 60-it inorlugu ukiullit tamarmik sulisinnaassusaat nalilersorneqartassaaq. Nalilersuinerup inernerisassavaa siusinaartumik soraarnerussutisiat annertussusissaata aalajangernera, siusinaartumik soraarnerussutisiat annertuunut, akunnattunut annikitsunullu immikkoortinneqartarput.
Siusinaartumik soraarnerussutisiaq annertooq: Ukiumut 110.664 kr.-inik annertussuseqarpoq. Siusinaartumik soraarnerussutisiat annertuut ikiliartuaartinneqalissapput kisimiittoq saniatigut 28.000 kr.-inik ukiumut aningaasarsisarpat, ukiumut 138.664 kr.-it sinnerlugit saniatigut aningaasarsisarsimaguni siusinaartumik aningaasarsisarunnaassaaq.
Aappariit siusinaartumik soraarnerussutisiaat annertooq annikillisinneqassaaq saniatigut ukiumut 128.000 kr.-inik isertitaqarsimappata, ukiumut 238.664 kr.-it sinnerlugit saniatigut isertitaqarsimappata siusinaartumik soraarnerussutisiaarutsinneqassapput. Siusinaartumik soraarnerussutisiat annertunerpaat pineqartarput sulisinnaassutsip 25 pct.-ianik annikinnerusumilluunniit sulisinnaasunit.
Akunnattumik siusinaartumik soraarnerussutisiat: Ukiumut 73.776 kr.-inik annertussuseqarpoq. Siusinaartumik soraarnerussutisiat akunnattut ikiliartuaartinneqalissapput kisimiittoq saniatigut 64.900 kr.-inik ukiumut aningaasarsisarpat, ukiumut 175.564 kr.-it sinnerlugit saniatigut aningaasarsisarsimaguni siusinaartumik aningaasarsisarunnaassaaq.
Aappariit siusinaartumik soraarnerussutisiaat akunnattut annikillisinneqassapput saniatigut ukiumut 164.900 kr.-inik isertitaqarsimappata, ukiumut 275.564 kr.-it sinnerlugit saniatigut isertitaqarsimappata siusinaartumik soraarnerussutisiaarutsinneqassapput. Siusinaartumik soraarnerussutisiat akunnattut pineqartarput sulisinnaassutsip 25 - 50 pct.-illu akornanni sulisinnaasunit.
Siusinaartumik soraarnerussutisiaq annikitsoq: Ukiumut 55.332 kr.-inik annertussuseqarpoq. Siusinaartumik soraarnerussutisiat annikitsut ikiliartuaartinneqalissapput kisimiittoq saniatigut 83.300 kr.-inik ukiumut aningaasarsisarpat, ukiumut 193.964 kr.-it sinnerlugit saniatigut aningaasarsisarsimaguni siusinaartumik aningaasarsisarunnaassaaq.
Aappariit siusinaartumik soraarnerussutisiaat annikitsoq annikillisinneqassaaq saniatigut ukiumut 183.300 kr.-it isertitaqarsimappata, ukiumut 293.964 kr.-it sinnerlugit saniatigut isertitaqarsimappata siusinaartumik soraarnerussutisiaarutsinneqassapput. Siusinaartumik soraarnerussutisiat annikitsut pineqartarput sulisinnaassutsip 50 - 75 pct.-illu akornanni sulisinnaasunit.